Read in Roman
Rog Aise bhi Gham-e-Yar se Lag Jatey Hain
Dar se Uth-te hain to Diwar se Lag Jatey Hain
Ishq Aaghaz mein Halki si Khalish Rakhta hai
Baad mein Saikdon Aazar se Lag Jatey Hain
Pahle Pahle Hawas ik-adh Dukan Kholti hai
Phir to Bazar ke Bazar se Lag Jatey Hain
Bebasi bhi Kabhi Qurbat ka Sabab Banti hai
Ro na Paen to Gale Yar se Lag Jatey Hain
Katranen Gham ki Jo Galiyon mein Uri Phirti hain
Ghar mein Le Aao to Ambar se Lag Jatey Hain
Dagh Daman ke hon Dil ke hon ke Chehre ke ‘faraaz’
Kuchh Nishan Umr ki Raftar se Lag Jatey Hain