یوں دی ہمیں آزادی کے دنیا ہوئی حیران

Yun Di Hamain Azadi

یوں دی ہمیں آزادی کے دنیا ہوئی حیران

اے قائداعظم، تیرا احسان ہے احسان

پاکستانی ملی نغموں کے حوالے سے دلچسپ بات یہ ہے کہ پاکستان میں ملی نغمے پہلی بار فلم بیداری میں گائے گئے ظاہر ہے اس دور میں ٹیلی ویژن نہیں تھااس لئے باقائدہ نغمے گائے یا فلمائے نہیں جاتے تھے البتہ فلمی صنعت موجود تھی تو فلم “بیداری” میں جومشہورِ زمانہ ملی نغمے گائے گئے انہیں سے ملی نغموں کا آغاز ہوا۔

اس سینما اسکوپ فلم کا پریمئیر سن 1956 کو ریجنٹ سینما لاہور میں کیا گیا تھا اس فلم کی مشہوری کی بڑی وجہ اس میں گائے گئے تین عدد ملی نغمے تھے جو آج بھی مشہور ہیں اورآپ نے کئی بار سنے ہونگے۔

یوں دی ہمیں آزادی کے دنیا ہوئی حیران ۔۔ اے قائداعظم، تیرا احسان ہے احسان….

ہم لائے ہیں طوفان سے کشتی نکال کے اس ملک کو رکھنا میرے بچوں سنبھال کے….

 آؤ بچو سیر کرنا تم کو پاکستان کی جسکی خاطر دی قربانی ہم نے لاکھوں جان کی….

ممکن ہےآپ کوفلم بیداری کے بارے میں زیادہ کچھ نا پتا ہولیکن اگر آپ نے ہمارا یہ بلاگ پورا پڑھ لیا تو آپ کو بہت کچھ معلوم ہوجائیگاجو آپ نےشاید پہلے کبھی نہیں سنا ہو۔ اس بلاگ کو لکھنے کا مقصد صرف ملی نغموں کی تاریخ بیان کرنا نہیں ہے بلکہ ہم چونکا دینے والے حقائق بھی آپ کو بتائیں گے۔

تو پڑھئیے۔۔۔

بیداری” کے نام سے سن 1956 میں پیش کی گئی یہ فلم دراصل دو سال قبل سن 1954 میں پیش کی گئی ہندوستانی فلم “جاگریتی” کا چربہ تھی۔ جی ہاں ناظرین”جاگریتی” ہندی زبان کا لفظ ہے جسکے معنی اردو میں “بیداری” یا “شعور” کے ہیں۔ اس فلم کی کہانی، کرداروں کی ترتیب اور گائے گئے ملی نغمے سب ہی کچھ کاپی کیا گیا تھا۔ مطلب فلم کے نام سے لیکر کہانی تک سب کچھ ہوبہو نقل کیا گیا تھا۔

بات یہیں ختم نہِں ہوئی اس فلم کی ایک اور خاص بات اس فلم کے مرکزی اداکار”رتن کمار” تھے، جنہوں نے ہندی فلم جاگریتی میں بھی  ایک اپاہج لڑکے کا کردار ادا کیا تھا۔ آپکو یہ بھی بتادیں کہ رتن کماربھارتی فلموں کے اداکار تھے اور “بیداری” انکی پہلی پاکستانی فلم تھی، اور وہ کوئی ہندو اداکار بھی نہیں تھے جیسا کے نام سے لگتا ہے، وہ ایک مسلمان اداکار تھے جنکا اصل نام سید نذیر علی رضوی تھا۔

اس فلم میں انکے ساتھ اداکار سنتوش کمار نے بھی کام کیا تھا وہ بھی مسلمان اداکار تھے اور انکا اصل نام سید موسٰی عباس رضا تھا۔اگر آپ اب تک اس بلاگ کو پڑھ رہے ہیں تو یقیناً یہ بلاگ آپکو اچھا لگا ہے تو اسے دوستوں سے شئیر کرنا مت بھولئے گا۔

اس فلم کی کہانی، اداکار اور نام تو کاپی کئے ہی گئے تھے، اس فلم کا میوزک بھی سیدھا سیدھا کاپی پیسٹ کیا گیا۔ آپ یہ جان کر حیران ہونگے کہ گانے کے بول تک ضروری ردوبدل کے بعد اسی میوزک پر گائے گئے جس پر ہندی فلم “جاگریتی” میں گائے گئے تھے۔

ہندی فلم جاگریتی کے نغمے “دے دی ہمیں آزادی بنا کھڑک بنا ڈھال سابرمتی کے سنت تو نے کردیا کمال” یہ بول مہاتما گاندھی کے لئے کی گئی تھی جسے بدل کرقائدِ اعظم کے لئے دوبارہ تیار کیا گیا۔

“یوں دی ہمیں آزادی کے دنیا ہوئی حیران ۔۔  اے قائداعظم، تیرا احسان ہے احسان”

دوسرا نغمہ تھا “آو بچو تمہیں دکھائیں جھانکی ہندوستان کی” جسے بدل دیا گیا “آو بچو سیر کرائیں تم کو پاکستان کی “

باقی دو نغمے” چلو چلیں ماں سپنوں کے گاوں میں “اور “ہم لائے ہیں طوفان سے کشتی نکال کے”بھی کاپی کرلئے گئے۔

فلم بیداری ہندی فلم جاگریتی کا چربہ تھی لیکن جاگریتی فلم کو بھی ایک بنگالی فلم “پری برتن”سے متاثر ہوکر بنایا گیا تھا جو حب الوطنی کے موضوع پر بنائی گئی تھی۔ دراصل اس بنگالی فلم اور فلم جاگریتی کے ڈائریکٹر ستین بوز تھے جنہوں نے اسی موضوع پر ہندی فلم بنائی۔

 فلم بیداری کے پیچھے اسکرپٹ چوری کرنا مقصد نہیں تھا بلکہ یہ فلم حب الوطنی کے جذبے سے بنائی تھی گو کہ نیا اسکرپٹ اور نغمے ترتیب دیئے جاسکتے تھے لیکن اس مشکل دور میں  بجٹ کو دیکھتے ہوئے کم خرچ بالا نشین کے تحت کاپی پیسٹ کیا۔ یاد رہے کہ وہ دور سیاہ و سفید فلموں کا دور تھا اور آزادی کے بعد ویسے بھی اتنا سب کچھ کرناآسان نا تھا۔ کچھ بھی ہو اس فلم میں گائے گئے نغے آج بھی کانوں میں رس گھولتے ہیں۔

اس فلم کی ایک خاص بات جو شاید آپکے لئے نئی ہو، قاضی واجد جو پاکستان ٹیلی وژن کے معروف اداکار تھے انہوں نے بھی اس فلم میں ایک بچے کا مزاحیہ رول ادا کیا تھا جبکہ معروف فلم اسٹار لہری نے بھی اس فلم میں مزاحیہ کردار ادا کیا تھا۔

Yun Di Hamain Azadi | Aye Quaid e Azam Tera Ehsan | Bedari