اپنے  ہر  جملے  کی  طاقت  جانتے  ہیں
چلیے  کچھ   تو   ما   بدولت   جانتے   ہیں
آپ  نے  اتنا  نچوڑا  ہے  کہ  اب  ہم
صرف  جینے  کو  غنیمت  جانتے  ہیں
آپ  کو  کچھ  بھی  سمجھتی  ہو  یہ  دنیا
آپ   تو   اپنی   حقیقت  جانتے  ہیں
آپ تو واقف ہیں نس نس سے ہماری
آپ   تو   ہم   کو   نہایت   جانتے  ہیں

جوشِ وحشت میں حد سے گزر جائیے
دشت میں خاک  بن  کر  بکھر  جائیے
آپ شہرت نہیں  جھیل  سکتے جناب
اس   بلندی   سے   فوراً   اتر  جائیے
زندگی کے لیے بے حسی شرط ہے
آپ   حساس   ہیں   آپ   مر جائیے

میاں وہ دن گئے اب  یہ  حماقت  کون  کرتا  ہے
وہ کیا کہتے ہیں اسکو، ہاں “محبت” کون کرتا ہے
کوئی غم سے پریشاں ہے کوئی جنت کا طالب ہے
غرض سجدے کراتی  ہے  عبادت  کون  کرتا  ہے

اتنا  مجبور  نہ  کر  بات  بنانے  لگ  جائئں
ہم تیرے سر کی قسم جھوٹی کھانے لگ جائیں
اتنے  سناٹے  پیے  میری  سماعت نے کہ اب
صرف آواز پہ چاہوں  تو  نشانے  لگ  جائیں
میں  اگر  اپنی  جوانی  کا   سنا   دوں   قصے
یہ جو لونڈے ہیں میرے پاؤں دبانے لگ جائیں

اتنی کم عمری  میں  لڑنا  سیکھ   گئے
خون   خرابہ   زہر   اگلنا  سیکھ   گئے
کب چڑیا  کے  بچے  اڑنا  سیکھیں  گے
سانپ کے بچے پیڑ پہ چڑھنا سیکھ گئے

اپنے معیار سے نیچے تو میں  آنے  سے  رہا
شیر بھوکا ہو مگر گھاس تو  کھانے  سے  رہا
کر  سکو  تو  میری  چاہت  کا  یقین  کر  لینا
اب تمہیں چیر کے میں دل تو دکھانے سے رہا

جگہ کی قید نہیں تھی کوئی کہیں بیٹھے
جہاں  مقام  ہمارا  تھا  ہم  وہیں  بیٹھے
امیر  شہر  کے  آنے  پہ  اٹھنا  پڑتا ہے
لہذا اگلی صفوں میں کبھی نہیں بیٹھے

عقابی زعم خوش فہمی میں اکثر ٹوٹ جاتا ہے
ہوائیں گھیر لیتی ہیں  تو  شہپر  ٹوٹ  جاتا  ہے
کہیں نظریں جماؤں تو جلن ہوتی ہیں آنکھوں میں
ذرا پلکیں جھپکتا  ہوں  تو  منظر  ٹوٹ  جاتا  ہے
مصیبت میں بزرگوں کے دلا سے کام آتے ہیں
اگر سینا  پتی  ٹوٹے  تو  لشکر  ٹوٹ  جاتا  ہے
میرا دشمن پریشاں ہے میری ماں کی دعاؤں سے
وہ جب بھی وار کرتا ہے تو  خنجر ٹوٹ  جاتا  ہے